INFORMACION I PËRGJITHSHËM RRETH SHQIPËRISË

Shqipëria është një shtet i pavarur, themeluar më 28 nëntor 1912  dhe njihet ndërkombëtarisht si Albania. Shtrihet në Evropën Juglindore, në Perëndim të Gadishullit Ballkanik, në koordinatat gjeografike: 39^o 16′ gjatësi dhe 42^o 39′ gjerësi. Shqipëria njihet zyrtarisht si Republika e Shqipërisë dhe kufizohet në veriperëndim me Malin e Zi, në verilindje me Kosovën, në lindje me Maqedoninë e Veriut, dhe në jug dhe jug-lindje me Greqinë. Në perëndim, Shqipëria laget nga deti Adriatik dhe deti Jon.

Shqipëria ka një sipërfaqe prej 28.748 km² dhe një popullsi prej rreth 2,4 milion banorë, sipas rezultatit të Censit 2023. Tirana është qyteti më i madh i Shqipërisë dhe njëkohësisht kryeqyteti i saj që prej vitit 1920. Shqipëria ka një pozitë të favorshme gjeografike, pasi gjendet në kryqëzimin e rrugëve më të shkurtra që kalojnë nga Mesdheu perëndimor për në Ballkan e Azinë e Vogël. Relievi i Shqipërisë është kryesisht kodrinor-malor. Lartësia mesatare e relievit është 708 metra, ose 2 herë më e lartë se mesatarja e Evropës. Mali i Korabit është maja më të lartë e Shqipërisë me një lartësi prej 2751 metra mbi nivelin e detit.

Shqipëria bën pjesë në brezin subtropikal dhe përfshihet në zonën e klimës mesdhetare, me dimër të shkurtër e të butë dhe me verë të nxehtë e shumë të thatë. Klima e Shqipërisë ka ndryshime të mëdha nga një krahinë në tjetrën dhe kontraste të mëdha në temperaturë, reshje, ndriçimin diellor, lagështirën e ajrit, etj. Ndriçimi diellor lëviz nga 2,731 orë në vit në Xarë të Sarandës në 2,046 orë në vit në Kukës.

Forma e qeverisjes:   Republikë parlamentare

Prefiksi telefonik ndërkombëtar: +355

Gjuhët zyrtare: Shqip

Valuta: Lek

Kalendari i festave zyrtare për vitin 2025

01 janar 2025	Festat e Vitit të Ri
02 janar 2025	Festat e Vitit të Ri
14 mars 2025	Dita e Verës
22 mars 2025	Dita e Nevruzit
30 mars 2025	Dita e Bajramit të Madh
20 prill 2025	E diela e Pashkëve Katolike / E diela e Pashkëve Ortodokse
01 maj 2025	Dita Ndërkombëtare e Punëtorëve
06 qershor 2025	Dita e Kurban Bajramit
05 shtator 2025	Dita e Shenjtërimit të Shenjt Terezës
22 nëntor 2025	Dita e Alfabetit
28 nëntor 2025	Dita Flamurit dhe e Pavarësisë
29 nëntor 2025	Dita e Çlirimit
08 dhjetor 2025	Dita Kombëtare e Rinisë
25 dhjetor 2025	Krishtlindje

Shënim: Në rastet kur festa apo festat zyrtare bie/bien në ditën apo ditët e pushimit javor (e shtunë dhe/ose e diel), atëherë pushimi shtyhet në ditën apo ditët pasardhëse të punës (e hënë dhe e martë).

---

“Edhè hâna do t’a dije,
Edhè dielli do t’ két pá,
Se per qark ksaj rrokullije,
Si Shqypnija ‘i vend nuk ká !”
- Gjergj Fishta -